Previous Next

MAEKOM Kolleita Manu-Frangu da-neen iha Munisípiu Covalima

03 Agostu 2019 — Tuir Planu Estratéjiku Dezenvolvimentu Nasionál (PEDN, 2011-2030), setór pekuaria mós sai potensiál hodi fó kontribuisaun signifikante atu hadi’ak nutrisaunTimor-oan no hasa’e númeru asesu ba na’an fresku nómos kria kampu servisu.

Hodi responde PEDN ne’e, ohin, membru MAEKOM selebra tan kolleita manu-frangu da-neen iha Suku Belacasac, Postu Administrativu Maucatar, Munisípiu Covalima hamutuk 2,500 manu-frangu.

Administradór Munisípiu Covalima, Afonso Nougeira Nahak dehan nia kontente ho prezensa Movimentu Asaun Ekonomia Komunitária (MAEKOM) tanba hanorin komunidade atu investe rasik iha setór produtivu.

“Ohin kolleita manu-frangu iha Covalima hatudu asaun konkreta husi komunidade ne’ebe apoiu husi kompania Cladotia FU ho nia parseira MAEKOM. Iha futuru, ha’u sei organiza komunidade hodi konvida fali prezidente MAEKOM atu halo dialogu ho kominidade agrikultór hodi sira envolve barak liután, nune’e bele hasa’e produsaun iha setór agrikola”, dehan Administradór.

Administrador agradese ba komunidade ne’ebé harii rasik nia manu-luhan, ne’e hanesan modelu ida ba komunidade agrikultór sira seluk. Administradór prontu atu fó apoiu atividade MAEKOM no komunidade ne’ebé hakarak investe iha setór integradu agríkola nian iha Munisipiu Covalima.

Líder grupu manu-luhan iha Belacasac, Leonito dehan sira kontente tebes hodi hakiak manu-frangu iha Covalima hodi fornese na’an fresku ba sira-nia komunidade nomós sira hatene katak Covalima sei sai potensiál industria ba petroliferu. Nu’udar ezemplu, agora ita iha ona Aeroportu no iha futuru sei konstroi tan Suai Supply Base.

“Covalima sei iha merkadu boot iha futuru tanba ne’e hahú agora ita tenke prontu atu responde futuru nesesidade liu-liu fornesimentu ai-han ba traballadór/a industria petroliferu sira. Ha’u-nia grupu sei hasa’e númeru hakiak manu-frangu ba 5,000-10,000,” dehan Leonito.

Prezidente MAEKOM, Rui Castro dehan Covalima oan sira kontinua harii manu-luhan hodi hakiak manu-frangu tanba sira hatene merkadu boot ida sei mosu no oinsá atu responde merkadu ne’e.

“Ohin ita kolleita hamutuk 4,000 manu-frangu iha Maucatar no Salele. Iha fulan Dezembru, Munisípiu Covalima sei atinji to’o 10,000 manu-frangu ne’ebé mai husi grupu haat hakiak nian. Ha’u fiar Covalima oan sira sei hasa’e tan númeru hodi responde merkadu boot liu-liu Suai Suply Base ba fornesimentu ai-han lokál tanba ita labele haree benefísiu ne’e favorese de’it ba ema seluk”, Rui dehan.

Prezidente MAEKOM dehan hakiak manu-frangu nu’udar industria família nian tanba ne’e nia nafatin enkoraja Timor-oan atu investe iha setór produtivu agríkola nian hodi hadi’ak ekonomia família nian.

“Ohin loron ita labele domina merkadu nasionál tanba ita Timor-oan la investe hamutuk no kuaze ema estranjeiru hotu. Tanba ne’e, konseitu negósiu modelu MAEKOM mak domina merkadu hahú husi baze liuhusi investmentu integradu iha setór produtivu agríkola nian,” Prezidente MAEKOM dehan.

MAEKOM aliña ona nia planu ho Planu Estratéjiku Dezenvolvimentu Nasionál Timor-Leste 2011-2030 ho objetivu atu eradika ki’ak, garante seguransa alimentar no hasa’e kresimentu ekonomia liuhusi setór agrikultura (PEDN, 2011). Nune’e, MAEKOM sei hasa’e númeru hakiak manu-frangu no investe tan iha setór agríkola sira seluk hodi responde merkadu iha área rurál, munisípiu no nasionál nomós prepara konteudu lokál ba dezenvolvimentu Projetu Tasi Mane liu-liu Suai Suply Base, Covalima, Refinaria Betanu, Manufahi no Liquid Natural Gas, Beaço, Viqueque.

Movimentu Asaun Ekonomia Komunitária [MAEKOM] nu’udar grupu ida ne’ebé kompostu husi Timor-oan sira ho profisaun no esperiénsia oin-oin ne’ebé kompromisu atu garante dezenvolvimentu ekonomia iha Timor-Leste, liu-liu iha setór produtivu agrikola nian, nune’e bele hakbi’it ekonomia família no kresimentu ekonomia nasaun nian.

Partisipante husi Administradór Postu Maucatar no Suai Villa, Xefe Suku Belacasa, Matai. Labarai no Holpilat, Komadante Polísia (PNTL) Maucatar, Diretór Instituto de Apoio ao Desenvolvimento Emprezarial (IADE), no komunidade. HOTU

Kontakta mídia

Jaime Reis
Mobile: 7738-0585
Email: Este endereço de email está sendo protegido de spambots. Você precisa do JavaScript ativado para vê-lo. 

Armindo de Jesus
Mobile: 7726-7767
Email: Este endereço de email está sendo protegido de spambots. Você precisa do JavaScript ativado para vê-lo. 


Imprimi