Previous Next

Diversifikasaun Ai-han Lokal Enkoraja Timor-Oan atu Servisu Maka'as iha Setór Agrikultura

Dili, 17 Agostu 2019 – MAEKOM hala’o ona investimentu dahuluk iha Timor-Leste iha setór pekuária hanesan hakiak manu-frangu no kolabora ona ho Madre Canossiana atu halo diversifikasaun ba produtu sira ne’e hodi fó kontribuisaun signifikante atu hadi’ak nutrisaunTimor-oan no hasa’e númeru asesu ba na’an fresku nómos kria kampu servisu iha territóriu tomak hodi diversifika ita-nia ekonomia tuir Planu Estratéjiku Dezenvolvimentu Nasionál (PEDN, 2011).

Ohin, iha Konventu Canossiana Balide, teste diversifikasaun produtu na’an manu-frangu, fahi no produtu agrikultura sira seluk ba prosesamentu ai-han XOURISU ho kompozisaun ingrediente lokál sira atu hasa’e sabór hodi nune’e iha futuru enkoraja agrikultór sira hodi kuda no hasa’e númeru produsaun atu bele orienta ba indústria nian.

Prezidente MAEKOM, Rui Castro dehan MAEKOM hala’o ona kooperasaun ho Madre Canossiana sira hodi prepara ingrediente lokál no teste hodi diversifika ai-han lokál ne’ebé prodús ona, nune’e bele orienta ona komunidade hodi servisu maka’as hodi kuda no prodús ho kuantidade boot.

“Ohin, nain Primeiru Ministru, prezidente dahaat, José Ramos-Horta, Bispo Diocese de Dili, Prezidente CCI-TL, Oscar Lima no konvidade sira seluk mai partisipa lansamentu diversifika ai-han lokál. Ne’e, ita hatudu ba sira katak produsaun husi MAEKOM bele ajuda governu atu hadi’ak nutrisaun Timor-oan sira nomós hadi’ak ekonomia uma-kain tanba Timor-oan rasik mak prodús, han no balun bele fa’an”, dehan Prezidente MAEKOM.

Prezidente Rui dehan MAEKOM nafatin konvida Timor-oan atu investe hamutuk iha setór produtivu hodi ita hamutuk mak bele kompete ba merkadu sira ne’ebé agora daudaun domina hela husi estranjeiru. Nia dehan Timor-oan sira ne’ebé investe sei sente na’in ba negósiu, ho alvu família ida, negósiu ida.

“Iha fulan Dezembru ita sei atinji 470,000 manu-frangu, númeru ne’e sei orienta ba industria. Tanba ne’e MAEKOM ho nia parseiru Cladotia FU sei monta no lansa makina prosesamentu manu-frangu tarde liu fulan Novembru. MAEKOM fiar katak harii industria ne’e sei responde ba merkadu nasionál”, dehan Prezidente Rui.

Madre Guilhermina Marçal, FDCC agradese ba parseira ho MAEKOM hodi dezenvolve ingrediente ba Timor-oan liliu foinsa’e sira hodi sira bele iha abilidade hodi diversifika produtu lokál sira iha futuru.

“Ha’u kontente atu ajuda Timor-oan hodi diversifika ita-nia ai-han lokál tanba dala barak ita hakarak han de’it ai-han importasaun. Ezemplu, manu-frangu importa husi rai liur ho prazu fulan ne’en ba leten liutiha ita konsume. Ne’e, prejudika ba ita-nia saúde. Liuhusi espozisaun diversifikasaun ai-han lokál bele enkoraja Timor-oan atu hadomi produtu lokál,” Madre Guilhermina Marçal, FDCC.

Madre Guilhermina Marçal, FDCC dehan nia sei koopera hamutuk ho MAEKOM hodi dezenvolve ingrediente lokál ne’e nomós hakarak atu fahe matenek no esperiensia ne’e ho foinsa’e sira.

Lansamentu Website no Loja Online

MAEKOM mós lansa-nia website (www.maekom.com.tl) atu fasilita informasaun ba Timor-oan iha setór komérsiu tantu hakiak na’in, parseiru negósiu, supermerkadu, hotel, restorante, alojamentu ka konsumidór/a, kona-ba produsaun, prosesamentu to’o merkadória ne’ebé sei fahe informasaun iha setór produtivu agrikultura nian.

“Website ne’e ajuda MAEKOM atu promove produtu lokál ne’ebé mai husi produtu Timor-oan nian. Website ne’e mós fasilita ita atu fa’an produtu sira liuhusi online para konsumedór/a sira ne’ebé hakarak hola produtu husi MAEKOM, konsumedór/a bele hameno tipu ai-han no bele lori to’o sira-nia rezidensia. Ne’e sei akontese iha futuru’’, dehan Prezidente MAEKOM.

Prezidente MAEKOM agradese ba Primeiru Ministru, Bispo Diocese de Dili, Prezidente Camara Comércio de Indústria Timor-Leste, Prezidente Dahaat Timor-Oan, José Ramos-Horta ne’ebé lansa diversifikasaun produtu lokál, website no loja online.

“Ami fiar Loja Online sei ajuda ba Timor-oan ne’ebé hakarak kompra produtu lokál nomós ajuda Timor-oan ne’ebé preukupadu ho nia servisu ka asuntu seluk ho maneira haruka ne’ebé fasíl, lalais no garante produtu-nia kualidade”, dehan Prezidente MAEKOM.

Movimentu Asaun Ekonomia Komunitária [MAEKOM] nu’udar grupu ida ne’ebé kompostu husi Timor-oan sira ho profisaun no esperiénsia oin-oin ne’ebé kompromisu atu garante dezenvolvimentu ekonomia iha Timor-Leste, liu-liu iha setór produtivu agrikola nian, nune’e bele hakbi’it ekonomia família no kresimentu ekonomia nasaun nian.

Partisipante husi membru Governu, Bispo Diocese de Dili, emprezariu/a nasionál, ajénsia internasionál, eis titulares no konvidadu sira seluk. HOTU.

Kontakta mídia

Jaime Reis
Mobile: +670 7738-0585
Email: Este endereço de email está sendo protegido de spambots. Você precisa do JavaScript ativado para vê-lo. ka Este endereço de email está sendo protegido de spambots. Você precisa do JavaScript ativado para vê-lo. 
Website: www.maekom.com.tl

Armindo de Jesus
Mobile: +670 7726-7767
Email: Este endereço de email está sendo protegido de spambots. Você precisa do JavaScript ativado para vê-lo. 
Website: www.maekom.com.tl


Imprimi