Previous Next

OFERESE BUAT NE’EBÉ MANU BROILER NO LAYER PRESIZA, SIRA SEI OFERESE BUAT NE’EBÉ ITA EMA PRESIZA

13 Setembru 2019 — Cladotia FU ho nia parseria Movimentu Asaun Ekonomia Komunitária [MAEKOM] koopera hamutuk ho PT. Charoen Pokphand Indonesia Tbk (CP) hala’o Workshop Internasionál loron-ida iha Dili, Timor-Leste. Workshop ne’e foku ba maneira hakiak Brolier modernu ho kualidade, aspetu nutrisaun no produsaun ai-han Broiler, análize oportunidade negósiu sira manu ho tolun (layers) iha Timor-Leste ho eskala ki’ik (500-1000).

Prezidente MAEKOM, Rui Manuel de Castro Perreira dehan workshop ne’e konvida peritu sira kona-ba hakiak manu (broiler) no manu-tolun (layer) husi CP atu fahe sira-nia matenek no esperiénsia hakiak, kuidadu no merkadoria ba membru MAEKOM sira ne’ebé iha harii luhan no hakiak iha Munisípiu sira.


Partisipante workshop maihusi luhan sira iha munisípiu-9. Foto: Armindo de Jesus/MAEKOM

“MAEKOM konvida peritu sira husi CP atu fahe esperiénsia no matenek ba haki’ak nain sira hodi sira bele hadi’ak liutan jestaun luhan no oinsá hasa’e kualidade manu broiler no manu-tolun sira iha futuru”, Rui dehan.

Reprezentate CP Indonesia, Sopyan Haris dehan Porsedimentu Operasionál ba Padraun Hakiak (POPH) atu ajuda membru MAEKOM hotu hodi hala’o jestaun hakiak no hakiak tuir POPH sei hasa’e kualidade manu broiler in termu produsaun.

“Oinsá manu broiler moris ho kualidade no saudavel, ita tenke fó han ai-han nakonu ho nutrisaun ne’ebé kompleta ona ho ingriedente sira, no espera manu hakiak sira bele han ai-han hotu hodi bele absorbe ba sira-nia isin,” dehan Sopyan.

Reprezentante CP ne’e rekoñese Timor-Leste iha potensiál ba negósiu ba hakiak manu broiler no manu-tolun (layer) tanba volume hakiak manu sira ne’e sei menus. Nune’e, CP sei fó nafatin asisténsia oinsá atu hasa’e kuantidade no kualidade hodi bele responde konsume nasionál.

“Ezemplu ba hakiak manu-tolun, tuir sensu 2015, populasaun Timor-Leste iha milaun 1.3. Sé atu responde konsume nasionál manu-tolun ba totál populasaun ne’e, membru MAEKOM tenke hakiak minimu manu tolun (layer) 100,000,” Sopyan dehan.

Sopyan garante hakiak manu hahú ho kapitál ki’ik, maibé esforsu atu nia rezultadu tenke sai boot. Ha’u fiar “MAEKOM sei nafatin servisu ho CP atu haree ba ai-han ne’ebé kualidade ba manu-broiler no layer nune’e manu sira bele prodús na’an no tolun ho kualidade mós. Iha futuru, MAEKOM bele oferese ona na’an manu ho tolun ne’ebé kualidade ba konsumendór/a iha Timor-Leste”.


Oradór sira husi liman-loos: Sofian (CP), Oscar Lima (Prezidente CCI-TL), Domingos Gusmão (Diretór Jerál Pekuaria no Veterinaria), Juliào dos Reis (Moderadór). Foto: Armindo de Jesus/MAEKOM

Reprezentante CP ne’e ho liafuan korazen dehan“Oferese buat ne’ebé manu broiler ka layer presiza, Liutiha sira sei oferese buat ne’ebé ita ema presiza”,

Prezidente MAEKOM dehan membru MAEKOM hotu ne’ebé ohin partisipa iha Workshop Internasionál ne’e hamutuk 42 maihusi munisípiu no partisipante sira seluk hamutuk ema 33.

Nia dehan “Ha’u agradese ba peritu sira husi CP ne’ebé ohin fahe sira-nia matenek no Prosedimentu Operasionál ba Padraun Hakiak Manu Broiler no Layer iha Timor-Leste. Ha’u fiar prosedimentu sira ne’e sai matadalan ba membru MAEKOM hotu hodi garante kualidade na’an manu broiler no mantolun ba konsumedór/a sira iha Timor-Leste “.

MAEKOM agradese ba oradór sira nasionál, inklui Prezidente CCI-TL, Oscar Lima, Diretór Jerál Pekuaria no Veterinaria, Domingos Gusmão no Reprezentante Banku Nasionál Komersiál Timor-Leste (BNCTL) no oradór internasionál husi CP, Sopyan Haris no Shyrul .

Movimentu Asaun Ekonomia Komunitária [MAEKOM] núdar grupu ida ne’ebé kompostu husi Timor-oan sira ho profisaun no esperiénsia oin-oin ne’ebé kompromisu atu garante dezenvolvimentu ekonomia iha Timor-Leste, liu-liu iha setór produtivu agríkola nian, nune’e bele hakbi’it ekonomia família no kresimentu ekonomia nasaun nian. HOTU

Kontakta mídia

Jaime Reis
Mobile: 7738-0585
Email: Este endereço de email está sendo protegido de spambots. Você precisa do JavaScript ativado para vê-lo. 

Armindo de Jesus
Mobile: 7726-7767
Email: Este endereço de email está sendo protegido de spambots. Você precisa do JavaScript ativado para vê-lo. 


Imprimi