Previous Next

Feto potensiál iha Munisípiu Baucau fornese servisu ba komunidade

Setór produtivu mak bele apoiu maka’as ba kresimentu ekonomia nasaun ida hodi kore-an husi depedensia rekursu naturais ba nasaun sira-nia dezenvolvimentu sustentavel.

Feto potensiál ida husi Baucau, Ola Costa ho membru nain-lima investe rasik hodi harii manu-luhan no hakiak manu-frangu iha Munisípiu Baucau. Asaun ne’e hatudu ba feto sira iha munisipiu refere katak feto mós sai autór ba dezenvolvimentu ekonomia iha Timor-Leste no ohin kolleita ona husi reprezentante Prezidente Autoridade Muníspiu, Sr Eduardo Filipe.

Feto potensiál, Ola Costa (faru-metan) no Reprezentante Prezidente Autoridade Munisípiu Baucau ofisialmente kolleita manu-frangu no asiste husi autoridade lokál, komunidade no ONG sira.

 

Ola dehan nia interese tebes atu investe iha setór produtivu hanesan hakiak manu-frangu. Nia dehan “Ha’u ho kolega sira koko atu tama iha mundu negósiu nian, ne’ebé laiha esperiensia iha negósiu, maibé ami feto-sira no mane balun brani atu investe iha setór produtivu hanesan hakiak manu-frangu tanba hetan asisténsia husi MAEKOM”.

Ami harii ona empreza naran BAHA PROMADIS, ENIN, hodi foku ba hakiak manu-frangu no nia distribuisaun iha merkadu. Esperiénsia pasadu, inan-feto sira-nia produtu lokál dalaruma la folin iha merkadu tanba menus informasaun no la hatene demanda merkadu. Nia fiar katak ho prezensa MAEKOM ami muda sistema oituan atu hala’o negósiu iha hakiak manu-frangu.

“Ami hahú hakiak no hetan asisténsia téknika husi MAEKOM. Maibé molok ne’e, ha’u-nia membru sira tenke aprende iha luhan sira ne’ebé eziste ona no totál investimentu rasik hodi hetan fornesimentu manu-frangu-oan $9,900 la inklui konstrusaun manu-luhan”, Ola dehan.

Ola fahe nia esperiénsia katak hakiak manu-frangu kuida liu bebé ida. Kuida ho maneira ne’e, ita bele minimiza risku sira negósiu nian, hanesan haree nia hahán, kontrola bee hemu, no hakerek progresu dezenvolvimentu manu sira. Ne’e hotu presiza pasénsia, badinas hodi taumatan didi’ak. Ami kontente ho nia rezulta ho loron-28 manu sira hetan ona 2.6kg liu fali padraun ne’ebé MAEKOM no Cladotia FU iha.

“Ha’u sente kontente tanba konvida loja-nain, restaurante, hotel no autoridade lokál atu partisipa iha kolleita dala-ualu manu-frangu no sira prontu atu sai distribuidór. Nomós ha’u kontente tanba fó ona servisu ba ema nain ne’en iha investimentu dahuluk hakiak manu-frangu”, Ola orgullu.

Prezidente MAEKOM, Rui Manuel de Castro dehan atu kria kampu servisu iha Munisípiu Baucau, 3% husi totál populasaun Baucau-oan tenke sai emprendedorizmu iha investimentu integradu setór produtivu ho nia diversifikasaun.

“Ezemplu, totál polupasaun Baucau 135,440 (Sensu atualiza, 2018), ita presiza emprendedorizmu hamutuk 4,063 hodi investe iha setór produtivu integradu no diversifikasaun hodi kria kampu servisu, no emprendendorizmu tenke haree ba potensiál atu dezenvolve sai oportunidade”, Rui dehan.

Prezidente MAEKOM dehan feto potensiál Ola Costa hanesan ezemplar ida atu koko sai emprendedorizma tanba halo asaun hodi investe iha setór produtivu. Nia dehan estudu balun ne’ebé hala’o husi Universidade no Institutu (UNTL no IOB, 2017) katak porsentu 90 ema ne’ebé akaba husi nivel sekundária sai emprendedorizmu no fó servisu ba kualifikasaun akademia aas sira.

Prezidente MAEKOM, Rui Castro (faru-modok) hamutuk ho autoridade lokál, ONG no loja nain sira kolleita manu-frangu ba dala-ualu.
Prezidente MAEKOM, Rui Castro (faru-modok) hamutuk ho autoridade lokál, ONG no loja nain sira kolleita manu-frangu ba dala-ualu.

“Mana Ola la hetan subvensaun públiku hodi investe iha setór produtivu no ho investimentu rasik, nia iha dixiplina no ambisaun maka’as atu espanda nia negóisu hakiak manu-frangu iha futuru. Ne’e komunga ona moto MAEKOM: Hahú husi Kiik, Neneik, Beibeik maibé tenke Mehi ba Boot”, Prezidente MAEKOM dehan.

Prezidente MAEKOM, Rui Castro konvida Baucau-oan atu sai emprendedorizu hodi hakiak na’in no to’os nain, so nune’e Baucau-oan bele fornesimentu ai-han kualidade no saudavel ba komundade iha futuru, nomós fornesimentu ba investimentu indústira hanesan Cement Timor ka Aeroportu Baucau.

Membru MAEKOM husi Baucau hakarak konvida autoridade lokál katak INVESTIMENTU RASIK iha Baucau atu fornese ai-han kualidade ba komunidade sira nomós apoiu governu lokál atu kria kampu-servisu iha futuru.

Reprezentante Prezidente Autoridade Munisípiu Baucau, Eduardo Filipe dehan Prezidente Autoridade Baucau, Sr Antonio Augusto Guterres fó parabéns ba Ola hanesan feto potensiál ida iha Baucau hodi investe iha setór produtivu hanesan hakiak manu-frangu.

“Ha’u orgullu ba membru MAEKOM liu-liu Ola ho nia membru sira ne’ebé espanda negósiu iha setór produtivu hodi minimiza manu importa ba Munisípiu Baucau”, Reprezentante Autoridade dehan.

Reprezentante Prezidente Autoridade Eduardo dehan sira prontu atu ajuda MAEKOM hodi identifika rai estadu nune’e bele espanda negósiu iha setór produtivu no industrializa produtu agrikola sira ne’e. Nia dehan favór hato’o pedidu husi MAEKOM ba Prezidente Autoridade hodi sira bele kanaliza pedidu sira ne’e ba Terras no Propriedades hodi identifika potensia rai estadu ba futuru industria manu-frangu no tolun iha Munisípiu Baucau.

Partisipante ba kolleita da-ualu iha Munisípiu Baucau maihusi autoridade lokál Baucau-Villa, Laga, Vemasse, Venilale no Quelicai, loja, restorante, hotel no ONG sira.


Imprimi