Previous Next

MAEKOM-nia sujestaun atu hadi’ak no alokasaun ho kualidade ita-nia OGE-2020 ba setór produtivu

Dili, 16 Janeiru 2020 — MAEKOM hala’o ona investimentu dahuluk iha Timor-Leste iha setór pekuária hanesan hakiak manu-frangu no kolabora ona ho Madre Canossiana atu halo diversifikasaun ba produtu sira ne’e hodi fó kontribuisaun signifikante atu hadi’ak nutrisaun Timor-oan no hasa’e númeru asesu ba na’an fresku nómos kria kampu servisu iha territóriu tomak hodi diversifika ita-nia ekonomia tuir Planu Estratéjiku Dezenvolvimentu Nasionál (PEDN, 2011).

MAEKOM-nia kapitál investimentu hodi hakiak manu-frangu/broiler iha Timor-Leste hahú husi ínisu to’o iha fulan Novembru 2019, ami kontribui ona maizomenus pursentu 20 husi nesesidade merkadu nasionál kada fulan. MAEKOM iha kompromisu atu hasa’e númeru to’o pursentu 40 iha tinan-ida ne’e tuir Planu Estratéjiku MAEKOM 2019-2023.

Durante tinan-ida, MAEKOM-nia investimentu kapitál hamutuk USD$1,225,625.00, la inklui rai no ativu (asset) sira seluk, nomós kria ona emprezáriu/a foun hamutuk 83 husi totál na’in ba manu-luhan 53 no kria ona servisu ba ema na’in 203 nomós ema ne'ebé rejistu hodi fa’an manu broiler to’o ohin loron ho totál ema 523.

Tanba ne’e, atu hadi’ak no alokasaun ho kualidade ba ita-nia Orsamentu Jerál Estadu-2020 (OGE-2020) ba setór produtivu, MAEKOM-nia sujestaun ba Na’in Deputadu/a Parlamentu Nasionál no Membru Governu, liu-liu Exelénsia Primeiru-Ministru ne’ebé lidera ita-nia OGE-2020 no hahú debate daudaun dezde horisehik, ami sujere atu fó konsiderasaun ba pontu sira tuirmai:

  1. Tanba redus ona orsamentu (OGE-2020) ba Ministériu Agrikultura no Peskas (MAP). MAEKOM sujere estadu iha OGE-2020, aumenta orsamentu iha programa Eskema Garante Kréditu ho montante USD$100,000,000.00 (milaun atus-ida) hodi fasilita toos-nain, hakiak-nain, no Timor-oan ne’ebé hala’o negósiu, liu-liu fa’an produtu agríkola, nune’e sira bele asesu ba programa ne’e ho funan ida razoável ne’ebé implementa husi Banku Nasionál Komérsiu Timor-Leste (BNCTL).
  2. MAEKOM sujere atu redus subvensaun públiku, viajen estranjeiru ba asuntu nebe ladun importante ba nasaun ne’e, nune’e orsamentu sira bele aloka fali ba MAP hodi apoiu iha setór produtivu no indústria kreativa sira.
  3. MAEKOM sujere atu prodús lei protesaun ida ba produtu agríkola rai-laran. Lei protesaun ne’e bele enkoraja to’os-na’in sira atu servisu maka’as hodi hasa’e númeru produsaun nomós kria no emprega servisu iha rai- laran.
  4. MAEKOM sujere atu estadu aloka orsamentu ba MAP hodi prepara planu ba Parseiru Públiku no Privadu (P3) ba investimentu ba Frangu-inan orijinál (indukan ayam), no inkubasaun mantolun (penetasan telur) manu-frangu.
  5. MAEKOM sujere ba Ministeriu Turizmu, Komérsiu no Indústria (MTCI) atu limita importasaun manu-frangu ne’ebé konzeladu (ayam potong) hodi fó espasu ba produtu lokál hanesan manu-frangu hodi hasa’e númeru hakiak iha Timor-Leste.
  6. MAEKOM fiar katak tinan-ida ne’e, Governu liu-liu MTCI sei oferese kouta manu-frangu entre porsentu 40 to’o 50 ba nesesidade konsumedór/a nasional.
  7. MAEKOM sujere atu governu bele fó lisensa ba importasaun manu-frangu tuir persentazen ne’ebé MAEKOM seidauk kompri iha tinan-ida ne’e.

Razaun sujestaun ba pontus hitu iha leten sei sai prioridade tanba MAEKOM prepara ona membru sira atu espanda investimentu iha setór produtivu sira seluk, nomós preparadu ona atu investe iha setór indústria hanesan harii MATADOURO hodi garante ai-han kualidade, saudavel ba konsumedór/a Timor-oan no kria kampu servisu iha futuru.

MAEKOM apresia tebes ba Na’in Deputadu/a no Membru Governu sira-nia apoiu masímu ba diverisifkasaun ita- nia ekonomia iha futuru.

 

Komprimentus,

EKIPA MAEKOM


Imprimi