MAEKOM Responde ba Kritika iha Mídia Sosiál "Facebook"

MAEKOM Responde ba Kritika iha Mídia Sosiál "Facebook"

Bondia Timor-Leste!

Movimentu Asaun Ekonomia Komunitaria (MAEKOM) agradese ba konsumidór broiler sira ne'ebé kontinua asesu publikasaun ba informasaun kona-ba Manu Broiler mós afeta ona ho moras Virus Corona (COVID-19) iha Mídia Sosiál "Facebook".  Ne'e fó atensaun másimu ba kompañia hakiak nain sira hodi atensaun sériu hodi evita Pandémika Virus Corona (COVID-19). Ami hakarak informa ba ita boot sira katak informasaun ne'e hoax ka laloos.

To'o ohin loron, laiha evidénsia sientífiku no relatóriu husi Saúde Mundiál (WHO) katak manu broiler mós afeta ona moras COVID-19, nomós ai-han sira hanesan seafood (ai-han tasi) no hahán seluk-seluk (Autoridade Padraun Seguransa Ai-han India -Food Safety Standard Authority of India). 

Iha Timor-Leste-nia temperatura sempre liu grau Selsu 35 no laiha virus ruma mak bele moris. Tanba ne'e, informasaun ne'ebé laloos (HOAX) no públika ona iha nasaun India, iha semana-tolu nia laran ho espekulasaun sira iha mídia sosiál, kauza ona kompañia hakiak manu broiler lakon lukru kuaze juta USD$182.00 tanba konsumidór manu broiler konsumu ona informasaun la'ós mai husi fontes kredivel.

MAEKOM ne'ebé oras ne’e daudauk hakiak manu broiler, ami hakarak asegura ba públiku atu labele fiar informasaun sira ne'ebé lahó apoiu ho evidénsia ruma. Ami sempre servisu hamutuk ho Ministériu Agrikultura no Peskas atu anúnsiu ba públiku iha kualkér atividade hakiak manu broiler no garante kualidade nomós livre husi moras oin-oin ne'ebé sei afeta ba manu broiler.

Ami hakarak fahe informasaun kona-ba hakiak manu broiler iha Timor-Leste, tanba sá Timor-oan hakarak harii grupu? Tanba sá ita presiza hakiak manu broiler iha ita-nia rai? MAEKOM hakarak fahe informasaun balun atu ajuda Timor-oan komprende no akompaña progresu hakiak manu tuirmai:

  1. Dadus importasaun ne'ebé MAEKOM hetan husi Kuarentena Timor-Leste katak kada tinan Timor-Leste konsume manu broiler (ayam potong) husi Brazil no Xina entre juta 14,000,000 no 16,000,000, ekivalente ho 1.16 juta to'o 1.33 juta (kada pesoál konsume na'an manu kuaze grama 900-1000 kada fulan).
  2. Manu broiler importasaun husi Brazil no Xina, ita la hatene forma ai-han ne'ebé fornese ba manu broiler. Husi MAEKOM-nia esperiénsia katak hakiak nain la'ós mai husi PT. Charoen Pokphand Indonesia, Tbk, sira kahur ona ai-han ne'ebé kontein ho balada-nia na'an ruin no ran. Ministériu Agrikultura no Peskas Timor-Leste (MAP) la autoriza atu kompañia importadór sira importa tipu ai-han sira ne'e tanba ai-han kontein ho ran no ruin perigu tebes ba saúde ema nian.
  3. MAEKOM kumpre rekomendasaun husi MAP ba kualkér hahán manu broiler iha Timor-Leste. Ami garante katak ai-han sira la kahur ho ran no ruin balada nian tanba ita suspeitu nafatin sé animal sira-nia ruin no raan kontein ho moras ruma; Ami rekomenda atu ajénsia importadór sira tenke kumpre lei MAP nian.
  4. Kompañia balun importa Manu broiler husi Brazil ka Xina ho durasaun tempu naruk molok to'o iha Timor-Leste. Situasaun ne’e bele implikasaun ba kualidade manu broiler nomós ba konsumidór-nia saúde.
  5. Bainhira manu broiler to'o iha Timor-Leste, ita seidauk iha Prosedimentu Maneja Seguransa Ai-han ne'ebé sai sasukat hodi transporte na'an manu sira no laiha regulasaun ida atu kontrola konjeladór na'an manu iha supermerkadu, loja ka kioske husi instituisaun kompetente, ne'e ita hotu-nia preokupasaun. Tuir estudu no esperiénsia MAEKOM katak konjelada na'an manu ba tempu naruk mínimu grau Selsu minus oitu (-8), no másimu grau Selsu Lima (5) no ba kraik tenke konsume iha loron-ida to'o loron-tolu nia laran tanba liu loron ne'e baktéria sei moris no sei fó implikasaun negativu ba konsumidór-nia saúde;
  6. Bainhira MAEKOM observa ba supermerkadu, loja, kioske no merkadu tradisionál sira iha territóriu tomak katak konjeladór ne'ebé konjelada na'an manu laiha termómetru atu sukat nia temperatura. Tanba ne'e, iha evidénsia ne'ebé publika ona tantu journal no mídia sosiál ka online iha fulan hirak liubá katak Timor-oan ne'ebé konsume na'an manu broiler konjeladu tenke baixa iha ospitál. Situasaun ne'e sai preokupasaun ba ita hotu atu kombate. 

Alende mós, Timor-Oan harii MAEKOM hodi dezenvolve setór produtivu tanba haree ba situasaun moris loron-loron ne'ebé ita-nia povu enfrenta;

  1. Inan ho oan barak iha Timor-Leste mak sei sofre malnutrisaun ne'ebé aas;
  2. Dezempregu sempre aumenta kada tinan no laiha oportunidade ba foinsa'e sira hodi dezenvolve sira-nia abilidade;
  3. Mínimu produtu lokál, liu-liu na'an manu hodi konsume loron-loron. Ezemplu, manu lokál ida-nia presu hahú USD$7.00-$20.00 ba leten. Ne'e implikasaun ba kapasidade kompras povu nian hodi asesu ba na'an fresku;
  4. Presu merkadu ba na'an karau no fahi atinji USD$10.00 kada kilo; Sé família-ida membru nain Lima, kilograma ida sei la sufisiente hodi atinji nesesidade nutrisaun família nian. Nune'e mós, na'an karau ka fahi mós kontein kolesteról aas kompara ho na'an manu fresku;
  5. Tuir avaliasaun presu merkadu manu broiler importa iha tinan-2018 katak grama 800 ho presu $2.25; 900g entre $3.00 no $3.25, 1000g entre $4.00 no $4.25. Manu broiler ne'ebé prodús husi MAEKOM ho presu $6.00 ho kilograma entre 1.8 no 2.3 (kada kilo ho presu $3.00). 

Tanba sá nu'udar Timor-oan, ita hotu tenke suporte MAEKOM?

  1. MAEKOM harii husi Timor-oan hodi fasilita Timor-oan nia nesesidade loron-loron ba konsume na'an manu fresku;
  2. MAEKOM nia nain mak Timor oan hotu, no loron-ba-loron Timor-oan barak iha territóriu tomak envolve ona hodi habelar MAEKOM-nia rede to'o nivel aldeia;
  3. MAEKOM harii ho fiar katak setór produtivu ne'e povu nian;
  4. MAEKO-nia tarjetu katak iha loron ida, família-ida bele iha negósiu-ida, no suku-ida iha produtu-ida. Tanba nu'udar nasaun ida tenke hadi'ak nia ekonomia liuhusi setór produtivu hodi kore-an husi dependénsia setór petrolíferu. Timor-oan hahú aprende atu halo buat ruma husi ki'ik ne'ebé ita hotu bele halo iha rai-laran, nune'e gradualmente ita labele depende nafatin ba nasaun seluk. Sé karik ita depedensia nafatin, hanesan kazu COVID-19 mak nasaun ruma taka sira-nia fronteira, Timor-oan rasik sei hetan problema;

Agora MAEKOM-nia servisu to'o iha nebe?

MAEKOM hahú loloos iha 2018, no to'o ohin loron –

  1. Ema nain 102 resin mak sai nain ba MAEKOM – hahú ho ema 10 resin;
  2. Iha manu-luhan totál 67 mak harii ona iha territóriu tomak;
  3. Husi manu-luhan sira ne'e, ema 260 resin mak hetan rekrutamentu hodi servisu iha manu-luhan refere;
  4. Ema 607 mak rejistu permanente hodi distribui manu broiler iha merkadu.

MAEKOM nafatin servisu hamutuk ho Ministériu Agrikultura no Peskas hodi kontrola movimentu balada sira ne'ebé ami hakiak hodi labele prejudika saúde konsumidór nian. Tanba ne'e, MAEKOM hakarak hato'o ba konsumidór sira kona-ba informasaun ne'ebé espailla iha mídia sosiál katak Na'an Manu Broiler mós afeta ba Virus Corona, ne'e laloos no falsu tanba informasaun ne'e la'ós fó sai husi fontes kredivel sira hanesan Ministériu Agrikultura no Peskas, Ministériu Saúde no parte relevante sira.

MAEKOM mós seidauk iha estudu ida katak konsume na'an manu bele provoka tensaun ka atakasaun-fuan (stroke) tanba ne'e konsume na'an manu fresku mak dalan di'ak liu hodi hadi'ak saúde konsumidór kompara ho manu broiler importa ne'ebé konserva ho substánsia kímika ruma.

 

Hakerek na'in husi:

Julião dos Reis, PhD

Fundadór no Diretór Ezekutivu MAEKOM.

 

Hakerek na'in kompleta ona estudu Baxarelatu iha Siénsia, Pós-graduasaun Diploma iha Saúde Ambientál, Mestradu iha Saúde Públika no Doutoramentu iha Epidemiolojia iha Universidade sira iha Australia. 

 


Imprimi